புறத்தே தள்ளு

போராடும் தமிழினமே போராடு தமிழ் க்
கோடரிக் காம்புகளை எதிர்த்தே நில்லு
ஊராரின் பணத்தினிலே வாழ எண்ணும் இந்த
எளியோரை எதிர்த்துமே நீ போராடு
சீரோடும் சிறப்போடும் வாழ்வதற்காய் ஈழம்
சிந்திடும் குருதிதன்னை எண்ணாமலே
தீராத ஆசையுடன் திருடும் இந்தத்
திருடர்களை எதிர்த்துமே நீ போராடு

கண்ணியமாய் வாழ்வோரின் கடமைதன்னைக்
கலைத்திட நினைப்போரைச் சாய்த்திடவும்
மண்ணெல்லாம் நல்ல தமிழ் பரவிடவும் தமிழ்
மாசற்ற இனமொன்றைப் பெறுவதற்கும்
உண்ணியாய் இருந்திடும் ஊனத்தன்மை
உலகைவிட்டுப் போக்கிடவும் பொசுக்கிடவும்
எண்ணமொன்றை உன்நெஞ்சில் பொறித்து வைத்து
என்றென்றும் எதிர்த்து நின்று போராடு

பெண்ணிற்காய் அடிபட்டார் கொலைகள் செய்தார்
பெரியவன் யார் என்பதற்காய் மோதிக்கொண்டார்
தன்னினத்தைப் பயமுறுத்தி உழைக்காமல்
தன்னைமட்டும் வளர்ப்பதையே பெருமை எனறார்
அந்நியத்தை எதிர்த்து நிற்கும் வீரர் அங்கே
ஆலமர விருட்சமாகப் பெருமை சேர்க்க(ப்)
புண்ணியங்கள் இவையனைத்தும் பொசுக்குதற்காய்(ப்)
புகுந்திட்ட கூட்டத்தை நீ புறத்தே தள்ளு.